Su Slam: sa fortza de su versu cun boghes, carenas e sentidos



No est cosa fàtzile a chistionare de poesia performativa in unu cuntestu che a su nostru, dominadu dae sas garas a bolu e dae sos cuncursos a taulinu. Duos mundos chi, comente podimus lèghere in sa cuntierra istòrica intre tziu Barore Sassu e Prantaferru, si sunt brigados prus de una bia in su tempus coladu.
Cuntierras a banda, sa gara a bolu ischimus ite est: rialia improvisada ma sena pannu nen giuria. E su cuncursu literàriu? Versos iscritos e firmados cun pseudònimu; giuria de espertos; letura eventuale de sa poesia su die de sa premiatzione. Sa poesia performativa, connota mègius comente "Poetry slam" cunforma a sa terra de orìgine (addae de s'Atlànticu), est un'àtera cosa.
Dòminat sa boghe, ma no est un'arte improvisada; sos versos los leghent in su palcu, ma no est unu "reading"; est una gara cun giuria, ma a sos giùighes los sèberant intre su pùblicu o los sorteant.
 «Est una cherta de libertade, a su nessi pro pagu tempus, petzi pro mèdiu de sa fortza de sas boghes, de sas carenas, de sos sentidos». Faeddos de Sèrgiu Garau, babbu mannu, mancari giòvanu, de su movimentu slam in Sardigna e fundadore (como presidente) de sa Lips, sa Lega italiana de poetry slam. «Sa realidade sarda - at annantu Garau - est una intre sas prus ativas in contu de cantidade, calidade e partetzipatzione de poetas e de pùblicu».
Comente funtzionat una gara slam? B'at unu "maistru de tzerimònias" chi la ghiat e unu notaju chi l'agiuat; sos poetas tenent tres minutos de tempus cun penalidades pro chie nche los bàrigat; sos giurados dant unu puntègiu; b'at unu prèmiu. Ma sos binchidores reales, comente si costumat a nàrrere, sunt sa poesia e su pùblicu chi s'aunint sena intermediàrios.
E pro su chi pertocat sa poesia sarda? «Su poetry slam - nos narat Giuanne Salis, notaju multi-prataforma, segretàriu sardu e vitze-presidente natzionale de sa Lips - podet acurtziare sas generatziones noas a sas garas poèticas tradtzionales».
A su presente registramus una signalatzione ispetziale in s'editzione colada de su "Premio Ozieri" cun sas poesias de Marcu Fenudi («A faeddare in sardu») e de Giuanne Oliva («Sardos»).
«Su de su slam - nos narat Crara Farina, atora, artista de su versu e "slammer ante litteram" - est unu mundu atentu meda a sa limba sarda. Non b'at pregiudìtzios e su bisu meu est chi b'apat una setzione slam in sos cuncursos literàrios a cumintzare dae su de Otieri».
Lalla Careddu, Luana Farina, Ignàtziu Chessa e Lisandru Doro sunt sos campiones sardos in sas bator editziones coladas.

Artìculu chi apo iscritu pro La Nuova Sardegna (Limbas 3.0) de su 2 de trìulas de su 2017