Sos binos de Baudelaire



Poeta malaitu, in su tinteri,
in sèmbalos sa musa la reduis,
e peri sos empìreos nos conduis
ca tue ses de versos binzateri.

Su netare, chi nos contas caente,
in sas petorras de massaju achèssidu
nche falat, animosu e agradèssidu
comente su nigheddu, o su Nepente.
Poeta pariginu decadente
de cuss’ispìritu ses presoneri.

Ispìritu chi finamentas prendet,
in sos trighinzos de “Paname” plebea,
sa ‘oghe de chie cantat sa pelea
cando fratorzos collit, posca bendet.
E su “flâneur” chi colat e l’intendet
paret chi suspat binu de istratzeri

Ma cando su pedinu est pro sa bumba
e su cojùviu petzi echerrore,
s’omine tuo fùrriat a mortore
a tales chi amprosa siat sa tumba.
In cue pedrufeghe si nch’arrumbat
comente chi nch’esseret in tzilleri

Coment’imbetzes chi nch’esserent, ambos,
a caddu de su ‘inu conc’a s’Eden
de sos bisos, sos amantes possedent
in bolu ispantosos sos arrambos.
A fizu ‘e Zeus li cantant sos thriambos
abbende·li de gosu su verzeri.

Sas notas de Euterpe, s’ermosura
de damas e sos sèmenes de giogu
in tene lu cajonant disaogu.
Ma in s’ampulla ebbia s’achimadura
de nuscos ti l’impuntzat sa natura
de solitàriu vate imbrodderi.

Cun Diònisu eternu sa misèria
‘e s’esistèntzia tue non nch’apartas.
Ma in aeras cun alas ispartas,
projetas sa poètica lumèria.
E custu mundu giughes a isèria
cosende rimas che a unu traperi.


Sas primas chimbe sestinas pertocant chimbe poesias de Baudelaire: L'âme du vin, Le vin de chiffonniers, Le vin de l’assassin, Le vin des amants, Le vin du solitaire (Le vin, Les fleurs du mal).

Post popolari in questo blog

Veleta (omenàgiu a Garcia Lorca)

Adiosu Vitòriu

Sonetos de Shakespeare - 1